Gucci lærir á píanóið

Emilíana má gera allt með kisa. Hann er ótrúlega kelin og ýkt mjúkur.

Er fjölskyldan að stækka???

Nú ætla ég að segja ykkur hvað gerðist á sunnudaginn var.
Ég sat í eldhúsinu á nærbuxunum að glugga í vikulega fréttablaðið og gæða mér á morgunnæringunni og Emilíana naut sín fyrir framan imbann, allt í kyrrum kjörum, unglingurinn sofandi og hin tvö ónefndu á Íslandi.
MMMmmmm... notaleg kyrrð...þar til dyrabjallan rauf hana. Ég opna, fel mig auðvitað bak við hurð eins og sæma þykir þegar dyrabjöllu er hringt á Sunnudagsmorgni og frúin ekki komin í sunnudagspússið. Ókunnug kona með kött í búri stendur á tröppunum, á bjagaðri dönsku,segist hún vera nágranni minn og spyr hvort hún megi koma inn..... huhh...mmm...hmmm...jo jú.. vent lidt jeg skal lige have tøj på!

Á meðan ég skelli mér í meira viðeigandi fatnað, hugsa ég með mér að hún hlýtur að vera úr einhverjum sértrúarsöfnuði, eða kannski kreisí geðsjúklingur, eða sölukona hmmmm, allavega gleypi ég ekki alveg nágrannasöguna, þykist nú vita svona ca. hvernig fólk lítur út í húsinu á móti og fólkið hérna megin götunnar þekki ég nú alveg. Ohh nú hefði Steini, stóri og sterki þurft að vera heima. ansas, jæja en svo kurteis sem ég er læt ég ekki bláókunnugu konuna með köttinn standa lengi og bíða og dríf mig því að rífa upp hurðina aftur og bjóða konunni inn.

Hún leggur þá búrið niður, opnar það og segir. "se minn katt"(berist bjagað fram). Jú já já ég sé stóran og mikinn kött sem búið er að sleppa lausum inn á heimili mitt.

Býður hún mér þar næst að eiga dýrið. hún sé komin með ofnæmi og geti ekki haft hann. Tja hmmm já nú sko hmmm okey, já en ég verð nú að bera það undir manninn minn(já já við skulum ekkert vera að fara út í smáatriði, maður minn er hann þó það sé ekki til á skjali...) já og svona aðeins að kynnast honum og svoleiðis já.Við spjöllum og jú mikið rétt hún býr í blokkinni á móti, bara ská á móti, þar þekki ég ekki hræðu. Hún stekkur heim eftir kattarbakkanum og matnum og .....PASSANUM! haldiði ekki að þetta eðaldýr eigi sinn eigin passa! vissi nú ekki að slíkt væri til.

Konan reyndist vera hin yndælasta og kötturinn er hér enn, ber hann hið snobbaða nafn Gucci, sem reyndar er stytting á tveggja lína nafni, er 4ra ára fress af góðum ættum, er innflytjandi eins og við og skilur bara Rússnesku, er kafloðin Siamsköttur með risastór blá augu og kann að opna hurðir sjálfur. Einnig kann hann að rétta fram loppuna en ég kann ekki að biðja um hana því ég kann ekki rússnesku. Er ég því búin að skrá mig á kvöldnámskeið svo ég geti talað við kjörsoninn...